(11) 1. อาสาทุปฺปชหวคฺโค

[119] ‘‘ทฺเวมา , ภิกฺขเว, อาสา ทุปฺปชหาฯ กตมา ทฺเว? ลาภาสา จ ชีวิตาสา จฯ อิมา โข, ภิกฺขเว, ทฺเว อาสา ทุปฺปชหา’’ติฯ

[120] ‘‘ทฺเวเม , ภิกฺขเว, ปุคฺคลา ทุลฺลภา โลกสฺมิํฯ กตเม ทฺเว ? โย จ ปุพฺพการี, โย จ กตญฺญู กตเวทีฯ อิเม โข, ภิกฺขเว, ทฺเว ปุคฺคลา ทุลฺลภา โลกสฺมิ’’นฺติฯ

[121] ‘‘ทฺเวเม, ภิกฺขเว, ปุคฺคลา ทุลฺลภา โลกสฺมิํฯ กตเม ทฺเว? ติตฺโต จ ตปฺเปตา จฯ อิเม โข, ภิกฺขเว, ทฺเว ปุคฺคลา ทุลฺลภา โลกสฺมิ’’นฺติฯ

[122] ‘‘ทฺเวเม, ภิกฺขเว, ปุคฺคลา ทุตฺตปฺปยาฯ กตเม ทฺเว? โย จ ลทฺธํ ลทฺธํ นิกฺขิปติ, โย จ ลทฺธํ ลทฺธํ วิสฺสชฺเชติฯ อิเม โข, ภิกฺขเว, ทฺเว ปุคฺคลา ทุตฺตปฺปยา’’ติฯ

[123] ‘‘ทฺเวเม, ภิกฺขเว, ปุคฺคลา สุตปฺปยาฯ กตเม ทฺเว? โย จ ลทฺธํ ลทฺธํ น นิกฺขิปติ, โย จ ลทฺธํ ลทฺธํ น วิสฺสชฺเชติฯ อิเม โข, ภิกฺขเว, ทฺเว ปุคฺคลา สุตปฺปยา’’ติฯ

[124] ‘‘ทฺเวเม, ภิกฺขเว, ปจฺจยา ราคสฺส อุปฺปาทายฯ กตเม ทฺเว? สุภนิมิตฺตญฺจ อโยนิโส จ มนสิกาโรฯ อิเม โข, ภิกฺขเว, ทฺเว ปจฺจยา ราคสฺส อุปฺปาทายา’’ติฯ

[125] ‘‘ทฺเวเม , ภิกฺขเว, ปจฺจยา โทสสฺส อุปฺปาทายฯ กตเม ทฺเว? ปฏิฆนิมิตฺตญฺจ อโยนิโส จ มนสิกาโรฯ อิเม โข, ภิกฺขเว, ทฺเว ปจฺจยา โทสสฺส อุปฺปาทายา’’ติฯ

[126] ‘‘ทฺเวเม, ภิกฺขเว, ปจฺจยา มิจฺฉาทิฏฺฐิยา อุปฺปาทายฯ กตเม ทฺเว? ปรโต จ โฆโส อโยนิโส จ มนสิกาโรฯ อิเม โข, ภิกฺขเว, ทฺเว ปจฺจยา มิจฺฉาทิฏฺฐิยา อุปฺปาทายา’’ติฯ

[127] ‘‘ทฺเวเม , ภิกฺขเว, ปจฺจยา สมฺมาทิฏฺฐิยา อุปฺปาทายฯ กตเม ทฺเว? ปรโต จ โฆโส, โยนิโส จ มนสิกาโรฯ อิเม โข, ภิกฺขเว, ทฺเว ปจฺจยา สมฺมาทิฏฺฐิยา อุปฺปาทายา’’ติฯ

[128] ‘‘ทฺเวมา, ภิกฺขเว, อาปตฺติโยฯ กตมา ทฺเว? ลหุกา จ อาปตฺติ, ครุกา จ อาปตฺติฯ อิมา โข, ภิกฺขเว, ทฺเว อาปตฺติโย’’ติฯ

[129] ‘‘ทฺเวมา, ภิกฺขเว, อาปตฺติโยฯ กตมา ทฺเว? ทุฏฺฐุลฺลา จ อาปตฺติ, อทุฏฺฐุลฺลา จ อาปตฺติฯ อิมา โข, ภิกฺขเว, ทฺเว อาปตฺติโย’’ติฯ

[130] ‘‘ทฺเวมา, ภิกฺขเว, อาปตฺติโยฯ กตมา ทฺเว? สาวเสสา จ อาปตฺติ, อนวเสสา จ อาปตฺติฯ อิมา โข, ภิกฺขเว, ทฺเว อาปตฺติโย’’ติฯ

อาสาทุปฺปชหวคฺโค ปฐโมฯ

(12) 2. อายาจนวคฺโค

[131] ‘‘สทฺโธ , ภิกฺขเว, ภิกฺขุ เอวํ สมฺมา อายาจมาโน อายาเจยฺย – ‘ตาทิโส โหมิ ยาทิสา สาริปุตฺตโมคฺคลฺลานา’ติฯ เอสา, ภิกฺขเว, ตุลา เอตํ ปมาณํ มม สาวกานํ ภิกฺขูนํ ยทิทํ สาริปุตฺตโมคฺคลฺลานา’’ติฯ

[132] ‘‘สทฺธา, ภิกฺขเว, ภิกฺขุนี เอวํ สมฺมา อายาจมานา อายาเจยฺย – ‘ตาทิสี โหมิ ยาทิสี เขมา จ ภิกฺขุนี อุปฺปลวณฺณา จา’ติฯ เอสา, ภิกฺขเว, ตุลา เอตํ ปมาณํ มม สาวิกานํ ภิกฺขุนีนํ ยทิทํ เขมา จ ภิกฺขุนี อุปฺปลวณฺณา จา’’ติฯ

[133] ‘‘สทฺโธ, ภิกฺขเว, อุปาสโก เอวํ สมฺมา อายาจมาโน อายาเจยฺย – ‘ตาทิโส โหมิ ยาทิโส จิตฺโต จ คหปติ หตฺถโก จ อาฬวโก’ติฯ เอสา, ภิกฺขเว, ตุลา เอตํ ปมาณํ มม สาวกานํ อุปาสกานํ ยทิทํ จิตฺโต จ คหปติ หตฺถโก จ อาฬวโก’’ติฯ